Dear Jane
從50年代走到90年代

2020-01-26     藝文集

50 年代Doo-wop、60 年代英式搖滾、70 年代重金屬搖滾、80 年代經典情歌曲式、90 年代Grunge Rock,你最愛是哪一種音樂風格?在時代急速轉變中,有幾多人仍在懷念過去?

2019,是Dear Jane 很重要的一年。年初完成了首個紅館演唱會《Dear Jane Yours Sincerely Live 2019》,四子坐下來反思自己的音樂路,在這歷史洪流中,從未忘記音樂帶給他們的美好回憶。新碟《Timeline》,Dear Jane 帶大家由50 年代走到90 年代,感受每個年代的各種音樂風格。

完成紅館騷後,Dear Jane 為新碟從年頭忙到年尾,笑言是一個好好的機會與藉口,讓他們做自己想做的事,演繹不同年代音樂,今次更遠赴西雅圖兩星期錄音,首次以母帶形式錄製,向經典音樂致敬。低音結他手Jackal 直言市場上以K 歌來表達情歌為主,他們卻想用以前的歌曲風格來表達,結他手Howie則表示:「用以前嘅曲式做唱片,都會擔心太『娘』,要做到有個平衡,係我哋四個最想做到嘅!」

母帶形式錄音 享受一Take 過完成
選擇以母帶形式錄音,歌曲錄出來更具完整性、音質更好,四子直言是個挑戰,主音Tim 說:「好想用樂隊形式完成錄音,起初都會有壓力,不過大家狀態都好好,《富上代》甚至係一Take 過完成!」鼓手Nice 直言愛上這種錄音方式,更笑言成本並沒有特別高,令他們更享受這種錄音方式。

黄天翱Tim《富上代》
「90 年代嘅《富上代》,呢首歌係幾開心,其實係我幾年前寫,一直擺咗喺度,因為呢類型嘅歌好難擺落唱片,後來林寶填完詞,發現大家對於呢個話題好有興趣,就係唔同嘅人,都會討論上一代、下一代嘅問題,上一代點睇下一代、下一代又點睇上一代,由細到大,大家都不停經歷呢樣嘢,呢首歌講得好中,而且一Take 過完成錄音!」


▲黎俊華Nice《搖滾理髮廳》
「呢種60 年代嘅曲風可能我哋都唔會再玩番,好有The Beatles、溫拿樂隊嗰種風格,對於我哋嚟講好特別,好難得嘅一個機會!遺憾嘅係拍唔到MV 同大家分享!」


▲翁厚樑 Howie《Dear Christmas》
「係50 年代嘅聖誕歌,亦係由呢首歌帶起成個Project。好喜歡,因為我好鍾意聖誕歌,我成日都好想做舊式曲風嘅聖誕歌,如果以現代、加上一隊樂隊,會演變成咩類型嘅50 年代曲風聖誕歌?我好想做一隻!聖誕歌人生一次,之後仲有無?唔知!其實喺寫呢首歌之前,我都講咗好多年㗎啦!」


▲伍漢邦Jackal《2084》
「Dear Jane 嘅情歌系列當中,可算係好冧冧豬嘅一首歌,以前我哋嘅歌都係慘情,或者有一絲苦澀味,呢首真係Sweet,拍MV 嗰陣都諗,係咪應該用番嗰個年代嘅風格去拍?不過最後都係用一個現代故事去放入首歌!」

TEXT:老詠誼

相關文章








ISSUE 670
ISSUE 669
ISSUE 668