告別傳統心形 傳遞愛意
朱古力工匠用心製作

2020-02-14     生活派

1936 年,日本モロゾフ製菓公司看準男性對收到情人節禮物的渴求,刊登了一則報紙廣告,推銷旗下朱古力產品。其後不二家及森永製菓等知名糖果公司發現情人節原來充滿商機,紛紛大力宣揚女性應向男性送贈情人節朱古力的文化,鼓勵女性藉著朱古力向心儀對象表達心意,奠下情人節朱古力的基礎。

追源溯始,情人節朱古力只是一門商家生意,隨著年月已漸漸成為情人節的指定動作。有人甘心大灑金錢購買,另一邊廂卻有人選擇 DIY,親手製作專屬的口味和款式,向對方送上濃濃心意。


Roger Fok(霍耀文),國際廚藝學院高級教導員,曾代表香港到世界各地參加朱古力比賽,並多次贏得殊榮,更成為首位成功打入「世界朱古力大師賽」總決賽的香港人。

追求驚喜 告別傳統心形
「我覺得情人節朱古力其中一樣好重要嘅嘢就係個 outlook,送俾人會唔會一個 wow effect,對我嚟講係要傳遞到個 message。」大多數人都會專誠製作心形朱古力傳遞愛意,不過擅長製作朱古力雕塑的朱古力工匠 Roger Fok 卻選擇以其他方式表達愛意,擺脫傳統心形的老土味,「我自己 style 就希望盡量年年唔同,唔鍾意年年都重複整同一個心型,所以之前我哋都試過整好多唔同款式。其中一個最滿意嘅作品,入面有幾粒朱古力,外面好似咕𠱸,上面擺咗隻糖戒指。嗰一年反應好好,好多人都好鍾意。」兩年前筆者有幸親眼見到 Roger 口中這件作品,第一眼實在不敢相信是由朱古力造成,逼真得差點衝口而出說句「 Yes,I do ! 」。未嚐到朱古力的味道,單憑視覺已感受到送禮者的愛意。

兩年前 Roger 跟商場合作,設計出戒指形情人節朱古力,是他最滿意的作品。

終被學生真情打動
情人節是餅師全年三大最忙節日之一,Roger 曾先後出任香港JW萬豪酒店及香港萬麗海景酒店糕餅廚師,忙得幾乎無情人節可言,「好多時如果我同女朋友慶祝都係等到我放工之後,所以過往都無特別慶祝情人節。」因工作致使,他多年來對情人節沒有特別憧憬。
Roger 邀請學生一同創作情人節朱古力,讓他們先行感受 情人節餅師的忙碌。

去年他選擇離開酒店,重返母校廚藝學院執教鞭,終為他的情人節添上一份甜蜜,「有班學生知道我啱啱喺度教書,佢哋自己整咗一個好簡單嘅心型朱古力俾我。一來因為自己成日都整呢啲,唔多唔少都會有啲厭,二來當你收到十八、九歲學生做嘅作品送俾你,會覺得特別窩心。」雖沒有 Roger 的巧奪天工但學生背後的心意卻成功打動他的心,正如送情人節朱古力,在乎的是送禮者花上了多少心機,「朱古力係一個好深嘅學問,我諗讀者最好親手整俾另一半,唔好買現成返嚟加工就算,真係要自己溶下朱古力,撈下,我諗你嘅另一半會開心啲。」

今年以情信作為設計概念,將朱古力化作情信寄進心形郵筒內。

TEXT:ELIM

相關文章

ISSUE 664
ISSUE 663
ISSUE 662